Нугъай мухъалда полициялъул бутIаялда чIварав Эрадиль Асановасул гIагарлъиялъ гьев чIваялда хурхур рагьараб такъсирияб иш Дагъистаналъул цIех-рехчагIазухъаги нахъе босун, шималиб кавказалъул федералияб округалъул цIех-рехчагIазухъе кьейилан тIалаб гьабулеб буго.
Дагъистаналъул прокуратураялъ рокъов туснахъ гьавун вугев динияв хIаракатчи Медетов Надир, туснахъалда тIамеян тIалаб гьабиялъул халгьаби букIана 17 октябралда республикаялъул тIадегIанаб диванханаялда. Прокуратураялъ лъазабулеб букIана Медетов къватIив тани, гьес жиндирго такъсирияб пиша гьоркьоб къотIизе тезе гьечIила ва гьев республика тун лъутизе бегьулилан. Амма диванханаялъ цебехун диваналъ къотIун букIанаб хIукмуги хисизабичIого Медетов рокъов туснахъ гьавун тана.
16 октябралда Дербенталда тIобитIараб хасаб операциялъул хIасилалда лъабго чи чIван вугин, гьел киналго жанубияб дагъистаналъул изнугьечIого яргъидгIуцIаразул къокъаялъул гIахьалчагIи рукIанилан лъазабулеб буго республикаялъул къуваталъул идарабаз. Гьезул баяназда рекъон ГIагараб заманалда гьел чагIи Дагъистаналда чанго террактги гьабун Шамалде тIуризехъин рукIун руго.
Гьал къоязда Россиялъул хIинкъигьечIолъи букIинабулеб идараялъул бетIер Александр Бортниковас лъазабуна гъоркьисалалде дандеккун, исана улкаялда террактал кIицIулниги дагьлъун ругилан. Экспертазул пикруялда рекъон гьел дагьлъиялъе гIиллалъун лъугьун буго ахираб заманалда россиялдаса гIемер экстремистал Шамалде ва ГIиракъалде рагъде ун рукIин.
МахIачхъалаялде аскIоре ЦIияблак мухъалдаса гочинарурал гIадамаз гIумру гьабун бугеб анцIгогIан росулъ анцIго къоялъ газ букIун гьечIо, гьоркьо –гьоркьоб гурони токги кьолеб букIун гьечIо. Гьелдаса разигьечIел гIадамаз кIиго къоялъ федералияб нух ккун букIана.
Нугъай мухъалъул жанисел ишазул идараялда Эрадиль Асанов чIварав полициялъул хIалтIухъанасда тIад гьес жиндирго хъулухъалда букIине кколелдаса цIикIкIун пайда босиялда хурхун такъсиргьабиялъул иш рагьун буго. ЦIех-рехчагIазул гьеб хIукмуялда разигьечIо бакIалъул гIадамал, гьез лъазабулеб буго полициялъуласда чи чIваяда хурхунги иш рагьизе кколилан.
6 октябралда Гъизилюрт мухъалъул Кироваул росулъ тIобитIараб хасабоперациялдаса хадуй ккурай Насибова ПатIимат кий йигеяли лъан буго 9 октябралда. Гьей низамцIунулез ккун йикIин гурони лъабго къоялъ кий йигеяли лъалеб букIинчIин, къуваталъул идарабаз гьелда хурхун киналгIаги баяналги кьолел рукIинчIин лъазабулеб буго Насибовалъул адвокаталъ. Бицунеб буго нижер мухбир МахIмудова ПатIиматица
Гьал къоязда Россиялъул Федерациялъул Мажлисалъул вице-спикер Александр Торшиница лъазабуна хIукуматалъ гIагараб заманалда спайсилан абулел рухIулел жал гьукъизе ругилан. Жеги официалияб къагIидаялъ тIубан наркотикал ругин чIезабичIел, гьел спайсаз гIемерав чиясе чорхое зарал гьабулеб бугилан ахIи балеб буго сиясатчагIаз. Дагьаб цебегIан спайсал рухIун Россиялъул батIи-батIиял регионазда 20 цIикIкIун гIолохъанчи азарханаялде ккун рукIана.
Нугъай мухъалъул полициялъул бутIаялда низамцIунулев чIваялда хурхун кIиго къоялъ тIоритIана митингал. Акция чагIаз лъазабулеб буго 9 октябралъул бакъанида гьев чи чIварав полициялъуласда тIад такъсиргьабиялъул иш рагьичIони жидеца дагьавги цIикIкIун чи вакIарарав митинг тIобитIизе бугила ва федералияб нух къазе бугилан.
Нугъай мухъалъул Терекли-Мектебалда тIобитIана 600 гIан чи гIахьаллъараб митинг. Гьелъул гIахьалчагIаз тIалаб гьабуна полициялъул бутIаялде щвезавурав 22 сон барав Эрадиль Асанов чIварав полициялъуласе тамихI гьаби.
6 октябралда такъсир гьабиялда щаклъи букIун ккурав чи Нугъай мухъалъул полициялъул хIалтIухъанас чIван вуго. Низам цIунулез лъазабулеб буго такъсирчиясдаса живго цIунулаго речIчIун бугин полициялъулас гьесда таманчайин. БакIалъул гIадамазул баяналда рекъон чIварасда щибго гIайиб букIун гьечIо.
6 октябралда Гъизилюрт мухъалъул Кироваул росулъ изнугьечIого яргъидгIуцIаразда ва къуваталъул идарабазул хIалтIухъабазда гьоркьоб ккараб тунка-гIусиялъул хIасилалда 3 чи чIван вуго. Гьезул цояв экстремист колин, гьединго кIиго низамцIунулевги чIван вугин лъазабулеб буго Россиялъул терроризмалде дандечIараб миллияб комитеталъ. Гьезулго баяназда рекъон Кироваулалда хасал тадбирал халат рахъунел руго.
Чанго къоялъ цеве къуваталъул идарабаз ккун вукIарав Дербент мухъалъул бетIер Къурбанов Къурбан 3 октябралда диваналъ хIукмуги къотIун кIиго моцIица рокъов туснахъ гьавуна. Гьесул адвокат гьеб хIукмуялда рази гьечIо. Къурбановас жиндирго хъулухъалдаса букIине кколелдаса цIикIкIун пайда босиялда щаклъи буго хасал идарабазул.
Унсоколо мухъалъул Временное росулъ хамиз къоялдаса нахъе халат бахъунеб буго къуваталъул идарабаз тIобитIулеб хасаб операция. Гьел тадбиразул хIасилалда чIваразул хIакъалъулъ батIи-батIиял баянал руго. Дагъистаналъул къуваталъул идарабаз кьурал баяназда рекъон гьенир хасал тадбирал жеги чанго къоялъ халат рахъинеги рес буго.
1 октябралъ Дагъистаналъул цIех-рехалъул идарабаз ккун вуго Дербент мухъалъул бетIер Къурбанов Къурбан. Гьес жиндирго хъулухъалдаса цIикIкIун пайда босиялъул щаклъи буго къуваталъул идарабазул. Гьеб ишалда хурхун диваналъ хIукму къотIизегIан кIиго сордо-къоялъ ккун вуго гьев.
30 сентябралъ чанго къоялъ цебе Казбек мухъалда лъазабун букIараб терроризмалде данде чIараб низам гьоркьоб къотIизе тун буго. Къуваталъул идарабаз гьеб низамалъул ва гьеб мухъалда тIоритIарал хасал тадбиразул кинаб хIасил ккарабали лъазабулеб гьечIо. Амма бакIалъул гIадамаз бицухъе хасал тадбирал тIоритIулаго, рохьов чIван вуго Алмахъ росулъа чи. Гьеб баян официалияб къагIидаялъ кисаниги къватIибе кьун гьечIо.
25 сентябралда щалали лъаларел чагIаз викъанин лъазабулев вукIарав Гъизилюрталдаса МухIамадов Сахратула ватун вуго. МухIканал гурел баяназда рекъон гьев вухунги вуго. Гьев лъалез абулеб буго жив кив вукIарав, лъица вухаравалицин бицинес бокьун гьечIила гьесие, гьев къуваталъул идарабазул вакилзабаз хIинкъизавун вугилан.
29 сентябралда Казбек мухъалда лъазабун буго терроризмалде дандечIчIараб низам. Россиялъул терроризмалде дандечечIараб комитеталъул баяназда рекъон хасаб низам лъазабиялъе гIилла буго Гумбет ва Казбек мухъалъул гIорхъода бугеб бакIалда изнугьечIого яргъидгIуцIарал ралагьизе хасал тадбирал тIоритIулел рукIин. Гьединго рузман къоялдаса нахъе Шамиль мухъалдаги лъазабун буго терроризмалде дандечIараб хасаб низам.
Гьал къоязда Дагъистаналда рагьана «Энергия Наследия» абураб ЧIикIаб ГЭСалъ 40 сон баялда хурхун тIобитIулеб выставка. Гьенир рихьизарун руго гьеб ГЭС балеб мехалда рахъарал суратал, гьанжесеб ГЭС бихьизабулеб видео.
25 сентябралъул къаси Шамиль мухъалъул ТIелекь росулъ чIван вуго 35 сон барав жамгIияв хIаракатчи. БакIалъул гIадамазул баяназда рекъон гьев вукIун вуго салафиязде дандечIарав чи, гьелъие гIоло чIвазеги чIванин гьевилан рикIкIунеб буго гIадамаз.
Загрузить еще
